தினை அரிசியில் அதிகளவு சத்துக்கள் நிறைந்துள்ளது. தினை அரிசியில் எப்படி தோசை செய்வது என்று பார்க்கலாம்.
தினை சீரக தோசை
தேவையான பொருட்கள் :
தினை – ஒரு கப்
அரிசி மாவு – கால் கப்
தயிர் – ஒரு கப்
தண்ணீர் – 2 கப்
மிளகு தூள் – 1 மேசைக்கரண்டி
பச்சை மிளகாய் – 2
சீரகம் – அரை தேக்கரண்டி
இஞ்சி – 1 துண்டு
வெங்காயம் – 2
தாளிக்க :
கடுகு – 1 தேக்கரண்டி
கறிவேப்பிலை – ஒரு கொத்து
மிளகாய் வற்றல் – 2
செய்முறை :
* இஞ்சி, வெங்காயம், ப.மிளகாயை பொடியாக நறுக்கி கொள்ளவும்.
* தினை அரிசியை வெறும் வாணலியில் நன்றாக வறுத்து ஆறவைத்து மிக்சியில் போட்டு பொடித்து கொள்ளவும்.
* ஒரு அகண்ட பாத்திரத்தில் பொடி பண்ணிய தினை ரவா, அரிசி மாவு, தயிர், தண்ணீர் தேவையான உப்பு சேர்த்து ஆப்ப மாவை விட இளகியது போல் கரைக்க வேண்டும். வேண்டுமென்றால் தண்ணீர் சேர்த்துக்கொள்ளலாம்.
* கரைத்த மாவுடன் சீரகத்தை பச்சையாக சேர்த்து அதனுடன், மிளகு தூள் பொடியாக நறுக்கிய இஞ்சி, பச்சைமிளகாய், வெங்காயம் சேர்த்து கலந்து வைக்கவும்.
* கலந்த மாவை அரை மணி நேரம் ஊறவைக்கவேண்டும்.
* தாளிக்க வேண்டியவைகளை தாளித்து அதனுடன் சேர்க்கவேண்டும்.
* தோசைக்கல்லை அடுப்பில் வைத்து கல் காய்ந்ததும் மாவை கரண்டியில் எடுத்து அள்ளி தெளித்த மாதிரி லேசாக ஊற்றி இருபுறமும் எண்ணெண் விட்டு மொறு மொறு என்று வந்ததும் எடுக்கவும்.
* இதற்கு தொட்டு கொள்ள தக்காளி சட்னி, தேங்காய் சட்னி சுவையாக இருக்கும்.