அது தெருக் கடையோ, ஃபைவ் ஸ்டார் உணவகமோ தவிர்க்கமுடியாத ஓர் உணவாகிவிட்டது ஃபிரைடு ரைஸ். சிக்கன், மட்டன், கோபி, மஷ்ரூம், பனீர், முட்டை… என நீள்கிற இந்த வறுத்த உணவு (சாதம்) பலருக்குப் பிடித்த, பலர் அன்றாடம் சாப்பிடுகிற ஒன்று. எளிமையான செய்முறை, எங்கு வேண்டுமானாலும் கிடைக்கும் என்கிற வசதி, சாப்பிடும்போது கிடைக்கும் அலாதிச் சுவை மற்றும் திருப்தியான உணர்வு ஆகியவை இதன் பக்கம் பெரும்பாலானவர்களைத் திரும்ப வைத்திருப்பதில் ஆச்சர்யம் இல்லை. தொட்டுக்கொள்ள கொஞ்சம் டொமட்டோ அல்லது சில்லி சாஸ் போதுமானது; கூடுதலாக பனீர் மசாலாவோ, சிக்கன், மட்டன் உள்ளிட்ட கிரேவியோ இருந்தால், விருந்துக்குச் சமமானது ஃப்ரைடு ரைஸ்!
ஃப்ரைடு ரைஸ்
ஒரு ரோட்டோரக் கடையில் எப்படி ஃப்ரைடு ரைஸ் தயாரிக்கிறார்கள் என்பதைப் பார்க்கும்போதே சிலருக்கு நாக்கில் சுவை ஊற ஆரம்பித்துவிடும். பெரிய கடாயில் சிறிது எண்ணெய்விட்டு, குடமிளகாய், பீன்ஸ், கேரட் காய்கறிகளைப் போட்டு லேசாக வதக்குவார்கள். பிறகு மிளகு, மிளகாய், உப்பு, மசாலா எனப் பொடி வகைகள். அத்துடன் சாதம் சேர்த்துக் கிளறும்போது எல்லாம் ஒன்றோடு ஒன்று கலப்பதற்கு ஏற்ப அடுப்பின் தீயை, கூட்டியும் குறைத்தும் ஜாலம் செய்வார் சமைப்பவர். கடைசியாக, கடாயோடு சேர்த்துத் தூக்கி, ஒரு குலுக்குக் குலுக்குவார். `ஃப்ரைடு ரைஸ் தயார்’ என அர்த்தம்.
ஃப்ரைடுரைஸ்
சிறிதளவு வேகவைத்த சாதம், உப்பு, கொஞ்சம் காய்கறிகள் இருந்தால் போதும், வாணலியில் காய்கறிகள், சாதம், உப்பு என ஒவ்வொன்றாகப் போட்டு வறுத்தெடுத்து நாமே ஃப்ரைடு ரைஸ் தயாரித்துவிடலாம். காய்கறிகளுக்குப் பதிலாக இறைச்சியும் சேர்க்கலாம். நளபாகச் சமையலுக்குப் பேர்போன நமக்கு இது ஒன்றும் புதிய விஷயமல்ல. புளியோதரை, எலுமிச்சை சாதம்போல, காய்கறிகளை சாதத்தோடு சேர்த்து வறுத்து இதையும் நம் முன்னோர்கள் முயன்று பார்த்திருப்பார்கள்தான். ஆனாலும், இன்றைக்கு உலகம் முழுக்க முட்டுச் சந்தில்கூடக் கிடைக்கும் ஃப்ரைடு ரைஸுக்கு சொந்தம் கொண்டாடுபவர்கள் கிழக்கு மற்றும் தென்கிழக்கு ஆசிய மக்களே. குறிப்பாக, சீனா, ஜப்பான், கொரிய நாட்டு சமையல் முறையில் இருந்து உருவாகிவந்தது ஃப்ரைடு ரைஸ்.
ஃப்ரைடு ரைஸ்
மீந்து, ஆறிப்போன உணவைச் சாப்பிட முடியாத சீனர்கள், கண்டுபிடித்ததுதான் ஃப்ரைடு ரைஸ் என்பவர்களும் இருக்கிறார்கள். ஒவ்வொரு நாட்டுக்கும் ஒவ்வொரு வெரைட்டி; ஆனால், செய்முறை என்னவோ கிட்டத்தட்ட ஒரே மாதிரியானதுதான். முக்கியமான சேர்மானம் வேகவைத்த சாதம். சைவப் பிரியர்கள் காய்கறிகளைச் சேர்த்தும், அசைவப் பிரியர்கள் முட்டை தொடங்கி, மட்டன் வரை சேர்த்தும் ஃப்ரைடு ரைஸ் தயாரிக்கிறார்கள். இந்தோனேஷியா, தாய்லாந்து, சிங்கப்பூர், ஜப்பான்… என பல நாடுகளில் ஆழமாக வேர் பதித்து வளர்ந்து நிற்கிறது இந்த உணவு. என்ன… இதில் சேர்க்கப்படும் வாசனைப் பொருள்கள் மற்றும் உணவுப் பொருள்களில் மட்டும்தான் சின்னச் சின்ன வேறுபாடு இருக்கும்.
அதேபோல ஒவ்வொரு நாட்டுக்கும் ஒரு தனித்துவமான வகை இதில் உண்டு. சீனாவில் `யாங்ச்சௌ’ (Yangzhou fried rice) வெகு பிரபலம். இதில் சாதத்துடன் முட்டை, இறால், வெங்காயம், வெள்ளரி, காய்கறிகள் எல்லாவற்றையும் போட்டுத் தயாரிக்கிறார்கள். மீன் சூப்போடு இதைச் சாப்பிடுவது அபார ருசி என்பது சீனர்களின் கருத்து. இதேபோல ஜப்பானில் `சாஹான்’ (Chahan), கொரியாவில் `போக்கியம் பேப்’ (Bokkeum-bap), தாய்லாந்தில் `காவோ பாட்’ (Khao phad), சிங்கப்பூர், மலேஷியா, இந்தோனேஷியா மூன்றுக்கும் பொதுவான `நாசி கோரெங் (Nasi goreng)… என ஒவ்வொரு நாட்டுக்கும் பிரத்யேகமான ஃப்ரைடு ரைஸ் வகைகள் உள்ளன. சீனாவின் செஷ்வான் (Szechwan) சமையல் முறை தொடங்கி உலகின் மூலை முடுக்கெல்லாம் பரவியிருக்கும் இதன் வகைகளின் பெயர்கள், செய்முறைகள், உள்ளிடப்படும் பொருள்கள் அத்தனையும் ஆச்சர்யம் தருபவை. 
ஃப்ரைடுரைஸ்
சீனாவில் கி.பி.589-618-ம் ஆண்டுகளுக்கு இடைப்பட்ட காலத்தில் உருவானதுதான் ஒரிஜினல் என்பவர்களும் இருக்கிறார்கள். பத்மினி டயட்டீசியன்அங்கிருந்துதான் தென்கிழக்கு ஆசியா முழுமைக்கும் பரவியதாம். சூயி (Sui) ஆட்சிக்காலத்தில் இது தயாரிக்கப்பட்டது. `யாங்க்சௌ’ என்கிற ஊரின் பெயரிலேயே இது அழைக்கப்பட்டது. ஆரம்பத்தில் சீனர்கள் தயாரித்த ஃப்ரைடு ரைஸ் எந்த பக்கவிளைவுகளையும் நம் உடலுக்கு ஏற்படுத்தாதது; ஆரோக்கியமானது; மக்கள் வாழும் பிரதேசங்களுக்கு ஏற்ப தயாரிக்கப்பட்டது என்றெல்லாம் சொல்கிறார்கள். ஆனாலும், நம் தெருவில் இருக்கும் குட்டி ஹோட்டல் வரை வந்துவிட்ட இது நம் உடலுக்கு, நம் வாழ்வியல் முறைக்கு ஏற்றதுதானா? பதில் சொல்கிறார் டயட்டீஷியன் பத்மினி…
“ஃப்ரைடு ரைஸ் எளிதாகச் செய்யக்கூடிய ஓர் சீன வகை உணவு. இது நம் உடல்நலத்தை பல்வேறு வழிகளில் பாதிக்கக்கூடியதும்கூட. இதில் சேர்க்கப்படும் எண்ணெய், நம் ரத்தத்தில் உள்ள கொலஸ்ட்ரால் அளவை அதிகரிக்கச் செய்யும். இதில் உள்ள அதிகப்படியான எண்ணெய், வயிற்றைப் பாதித்து, அதிக ஆசிட் உருவாக வழிவகுக்கும். இது, குடலுக்குப் பிரச்னையை ஏற்படுத்தும். இதில் உள்ள எம்.எஸ்.ஜி (MSG-Monosodium glutamate) தலைவலியை வரவழைக்கக்கூடியது. இந்த எண்ணெய் சேர்த்த உணவு வயிற்றைக் காலியாக்காமல் நீண்ட நேரம் தங்கியிருப்பதால், வயிற்று உப்புசம் ஏற்படும். 
ஃப்ரைடுரைஸ்
ஃப்ரைடு ரைஸை அதிகம் சாப்பிட்டால், இதில் சேர்க்கப்படும் அதிக அளவிலான உப்பு, உயர் ரத்த அழுத்தத்தை ஏற்படுத்தும். இந்த உயர் ரத்த அழுத்தம் பல இதய நோய்கள் ஏற்பட வழியமைத்துக் கொடுத்துவிடும். இதய நோய்கள் இருப்பவர்கள், இந்த உணவைத் தவிர்ப்பதே நல்லது. அரிசியில் அதிக அளவில் கார்போஹைட்ரேட் இருக்கிறது. அதிகப் பசியோடு இருக்கும்போது ஃப்ரைடு ரைஸ் சாப்பிட்டால், அந்த அரிசியின் மூலமாக உடல் எடை அதிகரிப்பதற்கு வழிவகுத்து, உடல்பருமன் வரை கொண்டுபோய் விட்டுவிடும். அதோடு சிக்கன், மட்டன் என இறைச்சி சேர்ந்தது என்றால், எண்ணெய் அதிகம் சேர்ந்திருக்கும். அதிலும் பயன்படுத்தப்படும் பிராய்லர் கோழி, ஆட்டிறைச்சி எந்த அளவுக்கு ஆரோக்கியமானது என்பதிலும், உத்தரவாதம் இல்லை. எனவே, ஃப்ரைடு ரைஸ் சாப்பிட வேண்டும் என்கிற ஆசை ஏற்பட்டால், குறைவான எண்ணெய் ஊற்றி, வீட்டிலேயே செய்து சாப்பிடுவது நல்லது” என்கிறார் பத்மினி.
ஆக, ஹோட்டல்களிலும், இதற்கான பிரத்யேகக் கடைகளிலும் எந்த எண்ணெயை ஊற்றுகிறார்கள் என்பது நமக்குத் தெரியாது. ஒருவேளை திரும்பத் திரும்பப் பயன்படுத்திய எண்ணெய் என்றால், அது நம் உடலுக்கு அதிக கொலஸ்ட்ரால் சேர்ப்பது உள்பட, எத்தனையோ உடல் பிரச்னைகளை ஏற்படுத்திவிடும். இறைச்சியாகட்டும், காய்கறியாகட்டும்… அவற்றின் சுத்தம் குறித்து நமக்கு எதுவும் தெரியாது. முக்கியமாக, நம் ஊரில் இதில் சேர்க்கப்படும் வினிகர், அஜினோமோட்டோ போன்றவை நம் உடலுக்கு ஏற்றவை அல்ல. ஆசைப்படுகிற குழந்தைகளுக்கு ஃப்ரைடு ரைஸ்கூட கொடுக்கவில்லை என்றால் எப்படி? கொடுக்கலாம்… வாரத்துக்கு ஒருமுறை… சுகாதாரமான முறையில் வீட்டில் தயாரித்து! நம் ஆரோக்கியம் எல்லாவற்றையும்விட முக்கியம் அல்லவா!