சப்பாத்திக்கு தொட்டு கொள்ள சன்ன பாலக் சூப்பராக இருக்கும். செய்துவம் எளிமையானது. சத்தானதும் கூட. இன்று இந்த சன்ன பாலக் செய்வது எப்படி என்று பார்க்கலாம்.
சத்தான சைடு டிஷ் சன்னா பாலக்
தேவையான பொருட்கள் :
வெள்ளை கொண்டைக்கடலை – அரை கப்,
பாலக்கீரை – ஒரு சிறிய கட்டு,
வெங்காயம் – 2,
தக்காளி – ஒன்று,
இஞ்சி – பூண்டு விழுது – ஒரு டீஸ்பூன்,
பச்சை மிளகாய் – ஒன்று,
மிளகாய்த்தூள், சீரகத்தூள், தனியாத்தூள், கரம்மசாலாத்தூள் – தலா கால் டீஸ்பூன்,
கஸ்தூரி மேத்தி (உலர்ந்த வெந்தயக்கீரை) – ஒரு சிட்டிகை,
சர்க்கரை, சீரகம் – தலா கால் டீஸ்பூன்,
உப்பு – தேவையான அளவு,
எண்ணெய் – ஒரு டேபிள்ஸ்பூன்.
செய்முறை :
* கொண்டைக் கடலையை 8 மணி நேரம் தண்ணீரில் ஊறவைத்து, குக்கரில் 5 விசில் வரும் வரை வேகவைத்துக் கொள்ளவும்.
* வெங்காயத்தை பொடியாக நறுக்கி கொள்ளவும்.
* தக்காளியை அரைத்து கொள்ளவும்.
* பாலக்கீரையை நன்கு சுத்தம் செய்து சிறிதளவு தண்ணீர் மற்றும் சர்க்கரை சேர்த்து ஒரு நிமிடம் கொதிக்கும் நீரில் போட்டு எடுத்து ஆற வைக்கவும்.
* பச்சை மிளகாயுடன் கீரையைச் சேர்த்து அரைத்துக்கொள்ளவும்.
* கடாயில் எண்ணெய் விட்டு, சீரகம் தாளித்து, இஞ்சி – பூண்டு விழுது போட்டு சிறிது வதக்கிய பின்னர் வெங்காயம் சேர்த்து வதக்கவும்.
* வெங்காயம் நன்றாக வதங்கியதும் தக்காளியை விழுதாக அரைத்து சேர்த்து… உப்பு, மிளகாய்த்தூள், தனியாத்தூள், சீரகத்தூள் மற்றும் கரம்மசாலாத்தூள் சேர்த்து பச்சை வாசனை போகும் வரை வதக்கவும்.
* அனைத்து நன்றாக வதங்கி எண்ணெய் பிரிந்து வரும் போது அரைத்த கீரை விழுதை சேர்க்கவும்.
* அடுத்து இதனுடன் வெந்த கொண்டைக்கடலையை சேர்க்கவும் (தேவைப்பட்டால் தண்ணீர் சேர்க்கலாம்).
* இதனை 5 நிமிடம் கொதிக்கவிட்டு, கஸ்தூரி மேத்தி சேர்த்துக் கிளறி இறக்கிப் பரிமாறவும்.
* சூப்பரான சைடு டிஷ் சன்னா பாலக் ரெடி. 