மற்ற சிறு தானியங்கள் மற்றும் தானியங்களைக் காட்டிலும் குதிரைவாலியில் அதிக அளவில் நார்சத்து நிறைந்துள்ளது. இன்று குதிரைவாலி கொத்தமல்லி சாதம் செய்முறையை பார்க்கலாம்.
குதிரைவாலி கொத்தமல்லி சாதம்
தேவையான பொருட்கள் :
குதிரைவாலி [ Barnyard millet ] – அரை கப்
சின்ன வெங்காயம் – 50 கிராம்
பூண்டு – 6 பல்
கொத்தமல்லி தழை – அரை கட்டு
மிளகு – சீரகபொடி – அரை ஸ்பூன்
உப்பு – தேவைக்கு
தாளிக்க :
சீரகம் – அரை ஸ்பூன்
நெய் – 2 ஸ்பூன்
நல்லெண்ணெய் – 2 ஸ்பூன்
செய்முறை :
* பூண்டு, சின்ன வெங்காயத்தை பொடியாக நறுக்கி கொள்ளவும்.
* கொத்தமல்லியை நன்றாக சுத்தம் செய்து பொடியாக நறுக்கி கொள்ளவும்.
* குதிரைவாலி அரிசியை நன்றாக சுத்தம் செய்து கழுவி குக்கரில் போட்டு அதனுடன் 1 கப் தண்ணீர் சேர்த்து குக்கரை மூடி வெயிட் வைத்து 3 விசில் வரும் வரை அதிக தீயில் வேக விடவும். பின்னர் தீயை குறைத்து 3 நிமிடங்கள் வேக விடவும். விசில் போனவுடன் குக்கரை திறந்து ஒரு வாயகன்ற பாத்திரத்தில் கொட்டி 1 ஸ்பூன் நல்லெண்ணெய் ஊற்றி நன்றாக கலந்து ஆற விடவும்.
* அடுப்பில் வாணலியை வைத்து மீதமுள்ள நல்லெண்ணெயை விட்டு சூடானதும் சீரகத்தை போட்டு தாளித்த பின் வெங்காயத்தையும் பூண்டையும் சேர்த்து வாசனை வரும் வரை வதக்கவும்.
* வெங்காயம் நன்றாக வதங்கியதும் அதில் கொத்தமல்லியை சேர்த்து வதக்கவும்.
* அனைத்தும் நன்றாக வதங்கியதும் மிளகு சீரகப்பொடி மற்றும் உப்பு சேர்த்து ஒரு பிரட்டு பிரட்டி விட்டு அதில் குதிரைவாலி சாதத்தை போட்டு அதனுடன் நெய் சேர்த்து நன்றாக கலந்து இறக்கி பரிமாறவும்.
* சத்தான குதிரைவாலி கொத்தமல்லி சாதம் ரெடி.
* விருப்பமான பொரியல் அல்லது தயிர் பச்சடியுடன் சுவைக்கவும்.
குறிப்பு :
கொத்தமல்லியை அரைத்தும் இதில் சேர்க்கலாம். 