மினி பாதாம் பர்பி

என்னென்ன தேவை?

பாதாம்பருப்பு – 100 கிராம்,
சர்க்கரை – 125 கிராம்,
உப்பு – ஒரு சிட்டிகை,
ரோஸ் எசன்ஸ் – சில துளிகள்,
அலங்கரிக்க – சில்வர்தாள் (மிட்டாய் கடையில் ஒட்டுவதுபோல் கடைகளில்கிடைக்கும்),
நெய் – 1 டீஸ்பூன்.

எப்படிச் செய்வது?

பாதாமை ஊற வைத்து ½ கப் பாலுடன் அரைத்தும் செய்யலாம். இப்போது கடைகளில் தோல் எடுத்த பாதாம் கிடைக்கிறது. அதை பயன்படுத்தியும் செய்யலாம். அது கிடைக்காவிட்டால் பாதாமை ½ மணி நேரம் சூடான தண்ணீரில் ஊற விட்டு தோல் எடுத்து உலர்த்தி பின் மிதமான சூட்டில் வறுத்தால் கரகரப்பாக வரும். ஆறியதும் அதனை மிக்சியில் போட்டு, விட்டு விட்டு அரைத்தால் நன்றாக பவுடர் போல் ஆகிவிடும். பின் தேவையான தண்ணீர் விட்டு ¼ கப் சர்க்கரை போட்டு கரைந்ததும், ரோஸ் எசன்ஸ் சேர்த்து இந்த பாதாம் தூள் போட்டு கைவிடாமல் கிளறவும்.

சுவை கூட ஒரு சிட்டிகை உப்பு சேர்க்கவும். சுருளும்போது கிளறி இறக்கி மீண்டும் 2 நிமிடம் கிளறி, நெய் தடவிய தட்டில் கொட்டி சமன் படுத்தி சில்வர் தாள் ஒட்டி 1 மணி நேரம் அப்படியே ஆறவிடவும். பின் விருப்பமான வடிவில் சிறு சிறு துண்டுகள் போடவும். பாதாம் அதிக விலை என்பதால் மினி பாதாம் பர்பி செய்து படைத்து பரிமாறலாம்.

குறிப்பு: இந்த பாதாம் விழுதை கிளறும்போது சர்க்கரை பதம் தேவை இல்லை. சுருண்டதும் இறக்கி கிளறி ஊற்றவும். அதன் மேல் சில்வர் தாள் ஒட்டவும்.