குழந்தைகளுக்கு மிகவும் பிடித்த முந்திரி, பாதாமை வைத்து ஒரு புதிய இனிப்பை இந்த தீபாவளிக்கு முயற்சி செய்து பார்க்கலாம்.
தீபாவளி ஸ்பெஷல் முந்திரி – பாதாம் ரோல்
தேவையான பொருட்கள் :
முந்திரி, சர்க்கரை – தலா முக்கால் கப்.
பாதாம் – அரை கப்.
சர்க்கரைத்தூள் – ஒரு ஸ்பூன்.
ரோஸ் எசன்ஸ் – சில துளிகள்.
பச்சை கலர் பவுடர் – சிறிதளவு.
செய்முறை :
* முந்திரியை மிதமான தீயில் பொன்னிறமாக வறுத்து மிக்ஸியில் பொடியாக்கி அதனை ஒரு பெரிய பாத்திரத்தில் போட்டு ரோஸ் எசன்ஸ் சேர்த்து கலக்கவும்.
* அடி கனமாக பாத்திரத்தை அடுப்பில் வைத்து அதில் சர்க்கரையுடன் சிறிது தண்ணீர் சேர்த்து கம்பிப் பாகு பதம் வந்ததும் இறக்கி, முந்திரி பவுடரில் சிறிது சிறிதாக ஊற்றி நன்றாகக் கலந்து, சப்பாத்தி மாவு போல பிசைந்து கொள்ளவும்.
* சிறிது சூடு இருக்கும்போதே நெய் தடவிய தடிமனான பிளாஸ்டிக் ஷீட்டின் மேல் மாவை வைத்து அதன் மேல் மற்றொரு நெய் தடவிய பிளாஸ்டிக் ஷீட்டை வைத்து சப்பாத்தி குழவியால் உருட்டி மெல்லிய சப்பாத்தியாக இடவும்.
* வெறும் கடாயில் பாதாம்பருப்பை போட்டு வறுத்து பொடியாகி, அதனுடன் கலர் பவுடர், சர்க்கரைத்தூள் சேர்க்கவும்.
* ரோல் செய்த முந்திரி சப்பாத்தியின் மேல் இருக்கும் ஷீட்டை எடுத்துவிட்டு, அதன் மேல் பாதாம் பவுடரைத் தூவி, பாய் போல சுருட்டி, துண்டுகளாக வெட்டு சாப்பிடவும்.
* குழந்தைகளுக்கு பிடித்தமான இந்த முந்திரி – பாதாம் ரோல், சத்தானதாகவும் சுவையாகவும் இருக்கும்.