காரைக்குடி கோழி குழம்பு மிகவும் காரமாகவும், சுவையாகவும் இருக்கும். நாளை (ஞாயிற்றுக்கிழமை) உங்கள் வீட்டில் இந்த காரைக்குடி கோழி குழம்பை வைத்து அசத்துங்கள்.
காரைக்குடி கோழி குழம்பு செய்முறை விளக்கம்
தேவையான பொருட்கள் :
கோழி – 1/2 கிலோ
தக்காளி – 2
வெங்காயம் – 2
காஷ்மீரி மிளகாய் தூள் – 1 1/2 டேபிள் ஸ்பூன்
கரம் மசாலா – 1 டேபிள் ஸ்பூன்
மஞ்சள் தூள் – 1 டீஸ்பூன்
இஞ்சி பூண்டு பேஸ்ட் – 1 டேபிள் ஸ்பூன்
எண்ணெய் – தேவையான அளவு
உப்பு – தேவையான அளவு
கொத்தமல்லி – சிறிது (அலங்கரிக்க)
அரைப்பதற்கு…
தேங்காய் – 1/2 மூடி
கசகசா – 1/2 டீஸ்பூன்
முந்திரி – 1 டேபிள் ஸ்பூன்
தாளிப்பதற்கு :
கடுகு – 1/2 டீஸ்பூன்
சீரகம் – 1/4 டீஸ்பூன்
மிளகு – 1/2 டீஸ்பூன்
எண்ணெய் – தேவையான அளவு
செய்முறை :
* தக்காளி, வெங்காயம், கொத்தமல்லியை பொடியாக நறுக்கி கொள்ளவும்.
* சிக்கனை சிறிய துண்டுகளாக நறுக்கி நன்றாக சுத்தம் செய்து கொள்ளவும்.
* அரைப்பதற்கு கொடுக்கப்பட்டுள்ள பொருட்களை மிக்ஸியில் போட்டு நன்கு மென்மையாக அரைத்து, தனியாக வைத்துக் கொள்ள வேண்டும்.
* ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், வெங்காயத்தைப் போட்டு பொன்னிறமாக வதக்கி, பின் இஞ்சி பூண்டு பேஸ்ட் சேர்த்து நன்கு வதக்கி விட வேண்டும்.
* அடுத்து அதில் மஞ்சள் தூள், மிளகாய் தூள், கரம் மசாலா சேர்த்து நன்கு வதக்கி விடவும்.
* மசாலா வாசனை போனவுடன் அதில் தக்காளியை சேர்த்து, அத்துடன் சிறிது உப்பு தூவி பிரட்டி, மூடி வைத்து தக்காளியை வேக வைக்க வேண்டும்.
* தக்காளியானது நன்கு வெந்ததும், அதில் சிக்கனை சேர்த்து, அத்துடன் சிறிது உப்பு தூவி பிரட்டி, மூடி வைத்து மிதமான தீயில் 8 நிமிடம் வேக வைக்கவும்.
* சிக்கனானது ஓரளவு வெந்ததும், அதில் அரைத்து வைத்துள்ள தேங்காய் பேஸ்ட் மற்றும் தேவையான அளவு தண்ணீர் ஊற்றி கிளறி, மூடி வைத்து, மிதமான தீயில் சிக்கனை நன்கு வேக வைக்க வேண்டும்.
* சிக்கனானது நன்கு வெந்து, பச்சை வாசனை போனவுடன் இறக்கி வைக்கவும்.
* கடாயை அடுப்பில் வைத்து எண்ணெய் ஊற்றி சூடானதும் கடுகு, மிளகு மற்றும் சீரகம் சேர்த்து தாளித்து, குழம்பில் ஊற்றி, கொத்தமல்லியைத் தூவினால், காரைக்குடி கோழி குழம்பு ரெடி!!!