குளிக்கும்போது உடலுக்கு பிரஷ் பயன்படுத்தும் பழக்கம் பலருக்கும் இருக்கும். குளிப்பதற்கு முன்பு பிரஷ் பயன்படுத்துவது பற்றித் தெரியுமா? சருமம் முழுவதையும் மிருதுவாக பிரஷ் செய்து, பிறகு குளிக்கச் செல்லலாம். இதை ‘டிரை பிரஷ்ஷிங்’ (Dry Brushing) என்பார்கள்.
* சருமத்தில் சேரும் கொழுப்பினால், பின்புறத்திலும் தொடையிலும் தடிப்புபோல ஒன்று ஏற்படும். இது, `செல்லுலைட்’ (Cellulite) எனப்படும்.
இது சருமத்தில் அதிகமாகச் சேர்ந்தால், ஒவ்வாமை ஏற்பட்டு, கட்டிகளாக மாற வாய்ப்பிருக்கிறது.
டிரை பிரஷ்ஷிங் செய்வதால், செல்லுலைட் உருவாவது தடுக்கப்படுவதுடன், அதனால் ஏற்படும் பாதிப்புகளையும் வரும்முன் தடுக்கலாம்.
* அழுத்தமாகத் தேய்த்துக் குளிப்பதால், சருமத்தில் காணப்படும் இறந்த செல்கள் முழுமையாக நீக்கப்படும். அதனால் அந்த இடத்தில் புதிய செல்கள் வேகமாக உருவாவதுடன், சருமம் பொலிவடையும்; மிருதுவாகும்.
* சருமத்தின் மேற்பரப்பில் சிறு சிறு நுண்ணிய துவாரங்கள் காணப்படும். அவை பாக்டீரியா தொற்றுகளால் அடைக்கப்பட்டிருந்தால், டிரை பிரஷ்ஷிங் செய்யும்போது அந்த அடைப்பு நீங்கிவிடும்.
அதன் காரணமாக, சருமம் தேவையான ஊட்டச்சத்தை சரியாக உட்கிரகித்து, ஆரோக்கியமாக மாறும்.
* சருமத்தின் மீது அழுத்தம் கொடுத்து தேய்க்கும்போது அடிப்பகுதியிலுள்ள நரம்புகள் அனைத்தும் அழுத்தம் பெறும். நரம்புகள் புத்துணர்ச்சி பெற்று, ரத்த ஓட்டம் சீராகும்.
அன்றைய தினத்தை புத்துணர்வுடன் கழிக்க இது பெரிய அளவில் உதவும்.
* சிறுநீரகமும் சருமமும் உடலின் நச்சுகளை வெளியேற்றுவதில் முக்கியப் பங்காற்றுபவை.
அந்த வகையில், இரண்டு உறுப்புகளுக்கும் நெருங்கிய தொடர்பு உண்டு. சருமம் சுத்தமாக இருந்தால், சிறுநீரகத்தின் பணிச்சுமை குறைந்து முன்பைவிட விரைவாகச் செயலாற்றத் தொடங்கும்.