சுவையான கொண்டைக்கடலை சாதம் செய்வது எப்படி

கொண்டைக்கடலையில் சுண்டல், குருமா செய்வதற்கு பதிலாக கொண்டைக்கடலை சேர்த்து சாதம் செய்யலாம். வித்தியாசமான சுவையுடன் இருக்கும்.

சுவையான கொண்டைக்கடலை சாதம் செய்வது எப்படி
தேவையானப் பொருள்கள் :

பச்சரிசி – 2 கப்
கொண்டைக் கடலை – 3 கைப்பிடி
பெரிய வெங்காயம் – 1
சின்ன வெங்காயம் – 10
தக்காளிப் பழம் – 1
இஞ்சி – ஒரு சிறிய துண்டு
பூண்டு – 3 பற்கள்
பச்சை மிள்காய் – 1
மிளகாய்த் தூள் – 1 டீஸ்பூன்
மஞ்சள் தூள் – சிறிது
தயிர் – 1 டீஸ்பூன்
தேங்காய்ப் பால் – 2 டேபிள்ஸ்பூன்
எலுமிச்சை சாறு – 1 டீஸ்பூன்
கொத்துமல்லி இலை – 1 கொத்து

தாளிக்க :

நல்லெண்ணெய் – 2 டீஸ்பூன்
சீரகம் – 1/2 டீஸ்பூன்
பெருஞ்சீரகம் – 1/2 டீஸ்பூன்
முந்திரி – 5

செய்முறை :

* கொண்டைக் கடலையை முதல் நாளே ஊற வைத்து விடவும். அடுத்த நாள் சிறிது உப்பு சேர்த்து வேக வைத்து நீரை வடித்து விடவும்.

* அரிசியை சிறிது உப்பு போட்டு முக்கால் பதத்திற்கு வேக வைத்து ஆற‌ வைக்கவும்.

* சின்ன வெங்காயம்,தக்காளியை அரைத்து வைக்கவும்.

* பெரிய வெங்காயம், பச்சை மிளகாயை பொடியாக நறுக்கி கொள்ளவும்.

* இஞ்சி, பூண்டு தட்டி வைக்கவும்.

* ஒரு வாணலியில் எண்ணெய் ஊற்றி காய்ந்ததும் தாளிக்க கொடுத்துள்ள பொருள்களை ஒன்றன்பின் ஒன்றாக தாளித்த பின் வெங்காயம், பச்சை மிளகாய் சேர்த்து நன்றாக வதக்கிய பின் இஞ்சி, பூண்டு சேர்த்து வதக்கவும்.

* அடுத்து கொண்டைக் கடலையை சேர்த்து சிறிது வதக்கிய பின் வெங்காயம், தக்காளி அரைத்த விழுதை சேர்த்து நன்றாக வதக்கவும்.

* அத்துடன் மிளகாய்த் தூள், மஞ்சள் தூள், தயிர், உப்பு சேர்த்து வதக்கவும். (ஏற்கனவே கடலை,சாதம் இவற்றில் உப்பு சேர்த்திருப்பதால் கொஞ்சம் குறைத்தே போட வேண்டும்).

* அனைத்தும் நன்றாக வதங்கியதும் தேங்காய்ப் பால் சேர்த்து சாதத்தைக் கொட்டி கிளறி மிதமான தீயில் மூடி வைக்கவும்.

* சிறிது நேரம் கழித்து எலுமிச்சை சாறு ஊற்றி, கொத்துமல்லி இலை தூவி ஒரு கிளறு கிளறி மறுபடியும் 5 நிமிடம் மூடி மிதமான தீயில் வைக்கவும்.

* இப்போது சுவையான கொண்டைக் கடலை சாதம் தயார்.