முட்டையுடன் உருளைக்கிழங்கு, பட்டாணி சேர்த்து குழம்பு செய்தால் மிகவும் சுவையாக இருக்கும். இதை எப்படி செய்வது என்று பார்க்கலாம்.
உருளைக்கிழங்கு முட்டை கிரேவி செய்வது எப்படி
தேவையான பொருட்கள் :
உருளைக்கிழங்கு – 3
பட்டாணி – 1/2 கப்
முட்டை – 6
பெரிய வெங்காயம் – 2
பச்சை மிளகாய் – 5
இஞ்சி பூண்டு பேஸ்ட் – 1 டீஸ்பூன்
கெட்டி தேங்காய்ப்பால் – 1 கப்
மஞ்சள் தூள் – 1/2 டீஸ்பூன்
உப்பு, எண்ணெய் – தேவையான அளவு
அரைக்க :
சிவப்பு மிளகாய் – 5
சீரகம் – 1 டீஸ்பூன்
தனியா – 1 டீஸ்பூன்
கசகசா – 2 டீஸ்பூன்
முந்திரிப்பருப்பு – 10
செய்முறை :
* உருளைக்கிழங்கை வேக வைத்து தோலுரித்து நறுக்கி கொள்ளவும்.
* முட்டையை வேக வைத்து தோலுரிக்கவும்.
* பட்டாணியை வேக வைத்துக் கொள்ளவும்.
* கொத்தமல்லி, வெங்காயத்தை பொடியாக நறுக்கிக் கொள்ளவும்.
* பச்சை மிளகாயை கீறிக் கொள்ளவும்.
* கடாயை அடுப்பில் வைத்து சிறிது எண்ணெய் ஊற்றி சூடானதும் அதில் அரைக்க வேண்டிய பொருட்களை போட்டு வாசனை வரும் வரை வறுத்து ஆறவைத்து மிக்சியில் போட்டு நைசாக அரைத்து கொள்ளவும்.
* அடி கனமான பாத்திரத்தை அடுப்பில் வைத்து எண்ணெய் ஊற்றி சூடானதும் வெங்காயம், பச்சைமிளகாய் போட்டு நன்றாக வதக்கிய பின்னர் இஞ்சி பூண்டு பேஸ்ட் போட்டு வதக்கவும்.
* இஞ்சி பூண்டு போஸ்ட் பச்சை வாசனை போனவுடன் அரைத்த மசாலா, உப்பு, மஞ்சள் தூள் போட்டு 5 நிமிடம் வதக்கவும்.
* அடுத்து அதில் உருளைக்கிழங்கு, பட்டாணி சிறிது நீர் சேர்த்து கொதிக்க விடவும்.
* நன்றாக கொதித்து பக்குவம் வந்ததும் அதில் முட்டையை இரண்டாக வெட்டி போட்டு அடுப்பை மிதமான தீயில் 5 நிமிடம் கொதிக்க விடவும்.
* கடைசியாக தேங்காய்ப்பால் சேர்த்து ஒரு கொதி வந்தவுடன் இறக்கவும்.
* இதன் மேல் கொத்தமல்லி தூவி பரிமாறவும்.
* இதை தோசை, சப்பாத்தி, பூரிக்கு தொட்டு கொள்ள சுவையாக இருக்கும்.